我們的回禮 - tailor made環保袋

用咩做回禮呢??? 呢個問題我諗左好鬼耐....

之前講過小妹多親戚...去過好多場婚禮.....收過既回禮都好多...
有蜜糖, 朱古力, 糖果, 筷子, fork & spoon, 年歷卡, 毛巾....等等.....
老老實實....唯一一樣對我黎講有興趣既只有朱古力...因為係金紗....即開..放入口！
其他"唔等使"既都好似無掂過...唔知佢地依家點呢??

↑
↑
↑
呢種"唔等使"既感覺係我最唔想出現係自已婚禮到....但我發覺回禮好難諗 
要比人覺得有用得黎又要有自已特色 (但係又要唔顯眼先有人會用)...最緊要係平呀!!
eg: 俾張印左新人嘜頭既年曆卡我....我可能去廁所已經掉左.......所以要低調！


最初諗過用我同顧生英文名整Sticky candy or papabubble candy做回禮.....
先去K11睇睇
Sticky candy 價錢....
$3300 / 6kg...再分300袋...每袋得20g...即係得幾粒糖....唔好睇又唔夠分.....
又或者$4000 / 8kg...分400袋...每袋20g....係夠分...不過用個袋仔入幾粒糖依然唔美觀....
轉packing又要再加錢....超級貴囉....
再諗諗下....雖然Sticky candy好好味...不過唔係個個識野...由其老一輩....見我擺幾粒糖入膠袋...
唔知會講乜....再加上會整Candy corner....算吧啦!
Sticky candy: http://sticky.chost8.com/
Papabubble candy: http://www.papabubble.com.hk/zh/about


之後比我個腦轉到個good idea!! 依家香港咁多地方買野無膠袋...整環保袋咪岩晒囉！！
可以加自已logo上去...d auntie去買野又唔會介意....就算d後生唔用都會拎兩個返去比媽咪啦
以上既原因已經附合左『有用』& 『有自已特色』兩個因素啦...跟住落黎就睇去價錢如何..
唔洗出街搵...因為唔知邊度有得整  但係我知道去淘寶一定有....
上淘寶搜尋下...你就會搵到好多可以幫你tailor-made環保袋既鋪頭.....
不過....我當初都遇到麻煩事......
我擺酒大概有25圍...25 x 12 = 300人...即係話...大概只有300人黎我婚禮...
我樂觀d計有人會拎多幾個...400個都一定夠....
但係..我係淘寶搵足兩日....99%鋪頭都同我講..最少要訂1000個先會幫我tailor made環保袋 
正當我down down地唔知點算既時候....終於比我搵到一間鋪頭可以400個起訂.....
開心到我想喊.....啦啦聲起左個初稿比賣家幫我整...不過有時同佢地溝通要有d耐性~~

比大家睇睇我想要既效果..因為我自已畫果個已經比我delete左....(呢個係Final version):
我同賣家講:
- 個Logo要放係正面正中間...logo上面寫Tank you for xxxxxxx......另加外框
- 背面要寫"The wedding of Yuki & Simon 29 November 2012..成個圖縮細到6份1...
(因為我驚我地個名太大真係會無人用.....所以要縮細...仲要放係背面)

呢個係賣家整比我睇既version...OMG.!...新婚慶典仲要簡體....
除左個logo同外框...無樣睇得上眼....
係咪我表達能力有問題???

之後好唔容易改左幾次...先整到final version....


從俾錢到收貨..前後唔夠10日......
有日放工返屋企見到座小山丘.....原來400個環保袋真係唔少野....

打開舖左係地下睇睇....雖然幾皺...不過品質ok....顏色係好sharp既桃紅色...
好喜慶feel...又唔娘....nice
400個環保袋....$960RMB.....抵呀！！！ 又睇得又用得！！

一個一個摺好...big day果日每個位都紅噹噹...一片桃紅色...應該好靚
不過七月頭收到既貨....到依家都淨係摺左大家睇到既呢幾個...

我自已拎左一個黎用...長期放係袋度...方便

唔知d客反應如何呢??? 好期待