過大禮

                                               9。29     星期六     大吉

今日係大吉日呢.....我們今日過大禮啦



因為顧生係上海人...上海人係完完全全地唔知我地廣東人既習俗同儀式..
未來奶奶同我講佢唔知咩叫過大禮...咩叫上頭...咩叫安床....
佢地上海人結婚只會揀一日大家方便...去政府登記...擺酒..
唔需要拜神..唔需要回門...Nothing~

而小妹娘親...百份百廣東人...初一、十五、過時過節都要拜神果種...
好多禮數媽咪都話要做...呢樣要...果樣都要


需然...大家都肯一人讓一步...未來奶奶可以都盡做...媽咪可以都盡減...(感激不盡!)
但係有陣時我夾係中間真係好辛苦...真係有苦自已知
未來奶奶話佢咩都唔識...叫我教佢~~~~ 講真..我又點會識??
我同佢講: 唔洗擔心...我會整張List比你照住買..跟住做...
另一邊..我就返屋企開定個excel..媽咪一路講..一路打...
間唔中仲要同佢講下數..叫佢唔好搞咁多野..減得就減
然而...中間仲要比顧生哦下我..問我呢樣唔做得唔得..果樣唔做得唔得
最嬲係佢講左幾次: 你依家嫁俾上海人就跟上海人習俗...
我頂你..你依家娶果個係廣東人囉!!!!! 你屋企辦喜事...我屋企唔係咩??
我媽咪已經做左好多讓步...好多野都用利事代替左...
而我自已一個係中間準備左成個月..問完我媽咪又同你媽咪交代...
準備list...仲有只要我可以買既野我都自已買左..
顧先生你自已日日返工..OT..過大禮既事幾時有麻煩過你??
我單單為左過大禮已經喊左兩、三次......壓力大到爆炸！

磨合左整整一個月...我地終於過大禮啦...而我地既過大禮真係新潮到無人有..
傳統既過大禮係...男家會搵親人將所有禮金&禮品送到去女家...古代叫提親！
而相方父母係唔會見到面..講究d係連新郎本人都唔會去女家..
但係因為顧生果邊無乜親人係香港..大部份都係上海或者外國...
所以我地既過大禮方法係: 兩家人約出黎係茶樓過大禮 (百無禁忌啦~)

折磨左自已整整一個月...黎到今日過大禮再爆一次勁既..26個鐘無得訓!!
話說小妹過大禮之前一直返緊overnight shift..
(有告訴過你們我在酒店工作嗎? Ha...just in case u don't know )
一大早8點放工...唔係返屋企會合屋企人...而係去左男家幫未來奶奶手...
因為佢問左我n次個禮金盒應該放d咩落去......
而媽咪又係我之前一晚出門口返工前整左兩包野黎(扁柏、碌柚葉 + 八京果)..
吩咐我要放入禮金盒.....(我媽咪好鐘意ad hoc 加野...)

就係咁...放工去左男家...自已執返自已個禮金盒 (!!!) ...再跟返張list睇下有無野漏...
夠鐘幫手拎野去酒樓(!!!) ...然後再同顧生落街接我daddy mami....
就係咁....我地就過左一個前無古人後無來者既大禮...
一跟食飯....一路吹水....

飲完茶..過完大禮...顧生就陪左我地返屋企....
媽咪又開壇話要品神...通知神仙同祖先佢個女我就黎要嫁啦...(我好眼訓)
最後同顧生乖乖拜完神已經下午六點幾.....唔爭在食埋飯.....
搞得黎...10點訓......

嗚嗚....經過26個鐘...我終於有得訓啦..


Btw...娘親打開個龍鳳餅話要拜神...我先第一次認真睇清楚龍鳳餅係咩樣...
(之前兩個哥哥結婚屋企都有龍鳳餅...不過我眼尾都無望過一眼)
而我既結論係: 望黎望去都唔知邊個係龍...邊個係鳳...

終於過完大禮啦....開心到想喊