結婚前一日 - 酒店 + 上頭篇

當初揀出門酒店就已經鎖定沙田hyatt...
近女家、近馬場、去男家唔遠、5 starts、international brand、新酒店...fit爆!!
酒店係經Agent book既...因為直接同酒店訂一定比同agent訂貴！
然後又因為有舊同事係裡面做....被upgrade係無可避免既事

因為當晚check in已經8點有多...仲未返屋企食飯...
食完飯仲要執野返酒店所以都無時間影下間房...
唯有之後接新娘既post大家可以留意下

鏡頭一轉....已經返屋企食完飯....去返酒店...
一坐低...媽咪就係佢個百寶袋到拎左一大壺燕窩出黎...
然後再拎出碗同匙羹....
我笑住問媽咪: 你仲有乜其他野拎出黎比我??例如錢同鑽石果d??
媽咪笑得好開心...答我:係得呢d你食唔食呀?
其實我想講"多謝"...不過我知道我一開口就會忍唔住喊...
所以keep住平時同媽咪一人頂一句既相處方式: 依家先黎補...係咪食完即刻靚架??

媽咪你唔知道我食呢碗燕窩..真係平般滋味在心頭...
回想自已細細個媽咪日日送我返學、日日都返屋企見到媽咪、日日見到媽咪煮飯比我地食..
一轉眼你既寶貝女聽日已經要嫁作人妻....眼淚忍得好辛苦....
 

食完燕窩...媽咪叫我先沖涼.....換紅色睡衣+新拖鞋...
而佢就開始準備開檀作法(上頭)既野
然後到我沖完涼....陪我過夜既3位姊妹都黎晒...媽咪都仲準備緊...
之前我有講過媽咪係百份百傳統既廣東人....過時過節...初一..十五都會品神...
嫁女咁大件事佢一定唔會馬虎...

 

媽咪整既野吸引左我三位姊妹圍觀
 

鏡頭一轉已經上完頭 (姊妹話要時間去搵返我既上頭相)

然後姊妹們就輪住沖涼...幫我燙禮服...準備聽日既遊戲..仲有fu mask
(聰明既媽媽話知道夜晚無時間沖涼...所以一早係屋企沖左先出門口)

 

其實我影完呢張相...大概零晨2點就上床訓...


不過5點幾又醒左....

其實我唔緊張...因為我清楚知道所有野已經well prepared....
可能係興奮比較多??!