紅豆 Pre-wedding @ 台灣 - Day 1 溝通篇

 

訓左兩個鐘果然有用...加上唔知係咪期待又緊張所以個人醒左...
出酒店上的士...講紅豆個地址比的士叔叔聽...佢就問我地係咪黎影結婚相...
的士叔叔話多數一男一女去台中都係影婚紗相喎....
台灣既的士叔叔果然好好傾....顧生又同人地上車傾到落車...

經常係其他blogger度見到紅豆既門面相....等我又黎一張

Google map真係一個好偉大既發明...
小妹係身體未出發之前已經用Google map去當地巡視左一次..
所以落車好快就搵到紅豆啦....如果我無get 錯紅豆坐落既位置係民居黎既...
大家如果見到 "唐寧街10號" 之後向前行多少少就會見到紅豆架啦

正當我地仲係門口影緊相果陣...我地見到有個男人坐左係度煲煙...
成個藝術家咁款坐係度吞雲吐霧...然後望左我地幾眼...悠然自得咁既樣...
我當時就諗緊佢係咩人..
(佢係邊個?? 一陣話你地知)

推門大門迎接我地既係 - 可可
我同顧生係愛狗之人...見到可可即刻痞底同佢玩....

跟住有個女仔過黎招呼我地坐底..我以為佢係客服Hannah..
問左之後先知原來客服係唔會係鋪頭裡面...個女仔叫咩咩..
佢比左兩杯水我地就簡單同我地講講package裡面包d甚麼東東...
跟住好快有個男人行到我地面前坐底...Oh...頭先係出面食煙個男人....
佢用廣東話開聲: Hello....我係REX!
REX! REX! REX! REX! REX! REX! REX! REX! OMG!!!!

我一直無指定攝影師同化妝師....一黎我相信紅豆既相唔會差...二黎兩個都指定要加好多錢...
但係我自已心裡面一直好希望係Rex或Mars其中一個....而我成日都同顧生灌輸呢個概念
所以當我一知道佢係Rex既時候...我十級開心...答左佢一句: 真的?!!
( 我們的攝影師是REX呀!!! 嘩哈哈XD )
顧生當然知道我十分滿意同勁開心啦...因為已經寫左上塊面度....
Rex問我地有無做功課...我就乖乖交出USB比佢睇...Rex話準備做得好足...V
跟住就叫佢d同事print造形相出黎...方便聽日比化妝師做參考..
呢個時候..顧生係我隔離講左句: Oh...乜你搵左咁多料咩???我仲以為你平時無乜野做添...
依家點先?
Rex再問我地有無諗好去邊度影相...台灣我地唔熟路...不過我地同佢講想影多d大自然...
同埋一定要影海灘..所以Rex就幫我地做決定...
首先去飛牛牧場..再去神社...然後影海灘日落...跟住夜晚就返紅豆影內景...
Rex全程有60%同我地講廣東話...真係利害...
好快溝通完佢就搵同事帶我地去試禮服lu..

係紅豆行去試身既地方好近....大概行3,4分鐘就到...係一棟民居既平台位置...
一邊for禮服...

另一邊係Studio...影內景同化妝既地方...


係玄關位換左拖鞋...入到試禮服既地方好舒服...地方好乾淨同安靜...

有個女仔 (可惜我已經忘記左佢叫咩名) 招呼我地....帶左我同顧生去揀禮服...
紅豆既禮服好多...有我鐘意既簡潔..亦有誇張style..有長裙短裙...有高貴..有可愛路線..
連短身旗袍都有幾件...任君選擇...最初我係度揀A line款...不過顧生同個女仔都叫我試試蛋糕裙..
話應該岩我多d....揀完一大輪搵左好幾件就去試身啦...試身位既setting好得意...
有一個podium位..前面有張sofa...我就係podium位換衫...顧生就好似睇Show咁係係sofa位度...
等我一換完就拉開趟簾...比顧生比意見...試完又試..換完又換..終於揀到聽日影相既禮服啦...
跟住個女仔就幫我度身...準備改衫比我聽日著....

係呢個時候有一個男仔行埋顧生度帶左顧生走......原來佢係黎幫顧生試禮服既...
(好彩唔係女人...亂咁跟人走!)

等我同顧生揀完衫之後...我地今日黎紅豆溝通既任務已經完成啦...
臨走前果個女仔提醒我地第二朝9點鐘要去到Studio度化妝做準備..仲有:
- 今晚早d訓...
- 臨訓前唔好飲咁多水
- 洗頭記住唔好落護髮素 (頭髮太順滑好難set頭)
- 第二朝起身要搽返日常護膚品..不過唔好化妝
- 記得食早餐

踏出紅豆已經晚上8點幾...我地搭的士返酒店...再行去逢甲夜市食野...
顧生好好胃口...因為聽日著婚紗果個係我...就算凸肚腩都有件西裝遮住...
難為我已經唔夠訓擔心會有熊貓眼...又驚食熱氣野會生豆豆...又怕食太多個肚腩唔聽話...
你話呀..邊個去台灣唔掃街...
等顧生食飽就返酒店...沖涼休息已經晚上11點......

(你以後我一定好好訓呢??......待績!)
______________________________________________________________

提提大家 溝通日 要注意既地方:

- 一定一定要做功課...將你鐘意既攝影風格同造型相拎去比你既攝影師同化妝師參考..

- 溝通日會揀埋禮服..所以新娘子記得帶Nu Bra / girdle
  (不過大部份紅豆既禮服本身已經有內置girdle..所以我會suggest帶Nu Bar)

- 可以將聽日要影相既道具放係紅豆...佢地會幫你Keep...

- 上身比較豐滿既B2B可以帶定透明Bra帶...(最Cheap果種就ok..因為只會用一日..除非你打算長用)
  因為幫我試衫個女仔話驚我著無肩帶款既禮服......胸位會反...有無咁誇張?
  所以最後我要自已行去附近鋪頭買透明Bra 帶...(唔算遠...不過絕對唔近..仲要好熱)