紅豆 Pre-wedding @ 台灣 - Day 4

最後一日係台灣...夜晚就要返香港啦...Back to reality...
我地訓到10點幾起身pack and store 行理....Check out....
係酒店附近行左陣...

搵左間餐廳食Lunch...
望下人地用機器包雲吞...都幾好笑...10個有4個係唔成功既..

Yummy...

飯後甜品不能少

搭左程的士去買手信...(唔知果度係咩地址...係的士叔叔帶我地去)
台灣的士叔叔都好好人....話我地去既地方好難搵的士回程...
只係收多少少錢...等我地買完野車返我地返酒店.....

返酒店執返d手信落"小桃紅"..我地就起程返搭高鐵返台北lu...

台灣既天空特別靚...

好唔捨得台灣...
台灣既人...台灣既事與物..

到機場..
寄行理...

Check in...起程返香港啦...
每一次係台灣起程飛返香港...係台灣既上空我都會望住眼下既台灣...依依不捨

四日三夜既台灣之旅終於完結啦....
回到我們的家 - 香港

紅豆 Pre-wedding @ 台灣 - Day 3 揀相日

影完相果晚返酒店訓到不醒人事...連早餐、午餐都無食..(濕濕碎啦...台灣周街都有好野食)
訓到下午4點先爬起身..將眼耳口鼻既位置擺返好就出發去紅豆揀相啦...
入到紅豆又見到可可..上次佢好快唔知走左去邊度...今次一定要抱住你影相先得

跟住無幾耐...陽光系男孩 - 綿羊過左黎同我地講解下部揀相既電腦如何運作..
同埋我地package包d乜野..仲有如果加相既收費等等....
跟住我同顧生就坐係電腦面前揀相啦...
懷著戰戰競競既心情打開電腦....
wa...d相需然只係調左色未執過...不過已經覺得非常唔錯啦...
只係我同顧生兩個太肥美...要修修d手臂同腰位...
不過有d靚到直頭唔需要修改添.....
Rex果然無令人失望...品質既保證...當然唔小得綿羊同欣怡既功勞啦
其實係咁多靚相裡面揀40張係件難事...不過我一早已經同顧生約法三章 - 唔加相！！
如果任何一方有加相既衝動..另一個人一定要制止佢.....
咁到底邊個有加相既衝動呢?? 姿整怪 - 顧生囉...
顧生呢個"八婆仔"呢張又話靚..果張又話想要...跟住問我不如加相好唔好?!
當然唔可以啦! 我地仲有一輯相未影...唔可以亂洗錢呀寶寶！
經過我地一輪爭議...最後揀左岩岩好40張相出黎...
揀埋相簿封面...傾埋d細節...搞掂！

"八婆仔"顧生呢個時候又走去問下人地附近有咩好野食...
綿羊問我地想食咩....顧生話聽講台灣火鍋很不錯......
點知綿羊話附近真係有火鍋出名呢...
決定去食火鍋...櫃台小姐咩咩就幫我地打去訂位...好窩心呢...

Ps. 大家係揀相當日可以叫佢地用順豐寄相簿比你...
相比起FedEx平好多架

鼎王麻辣鍋
台中市北區漢口路4段385號
http://www.tripodking.com.tw/

各位鐘意食火鍋既朋友千期唔好錯過...因為呢度真係好正...
裝修靚...地方大...Service好 ...
(佢地既員工每一次Serve完我地之後都會同我地90度鞠躬呀..行咁大個禮..搞到我同顧生唔好意思成日煩住佢地)...
材料新鮮好味...仲有大家見唔見到我地係用個鼎黎打邊爐?? 非常有趣

需然價錢有點兒貴....但係絕對超值...點解??
我地叫既係鴛鴦鍋...(麻辣鍋有硬豆腐+豬紅...東北酸菜鍋有大量酸菜)
平時我地係香港食火鍋...當個鍋唔夠水既時候...待應係會幫你加水...好小小既會幫你加清湯...
但係鼎王呢度係連配料都一齊幫你加...佢地完全係不斷幫你refill...不斷加..不斷加....
加到我同顧生叫佢地唔好再加.......所以其實只要另外叫小小野食就夠啦...



聽綿羊講呢度既火鍋係可以打包拎走(有趣!)...亦都因為我地其實要留肚食宵夜 (要爭取時間呀嘛!!)...
所以我地食左一陣就叫佢地打包拎走...點知...
佢地又重新幫我地refill左兩大袋....你地睇下我果部渺小既iPhone.....點食得咁多


不過...一場黎到台灣...當然要係最少既時間內食最多野....仲有爭取時候Shopping...
我地返酒店擺底兩袋火鍋...出去又食過..



顧生同我shopping大豐收..兩個人...四隻手...捧住d shopping bag返酒店
返到去酒店....見到個兩大袋火鍋......哈哈哈...


黎緊我好快會post 台灣Pre-wedding既相...
不過私隱問題...只限"關注"左既blog友先會睇到

紅豆 Pre-wedding @ 台灣 - Day 2 影相日

影相前一晚11點左右訓....以為會一覺訓天光...點知訓到3點幾竟然醒左..再都訓唔返
個人真係好辛苦...坐起身呆呆滯滯睇電視睇到天光...用酒店wifi上網睇天氣...
間中有大雨??!!!..個心即刻好不安...之前見過另一個blogger就係因為落雨影唔到相而要改期....
好驚呢件事會發生係自已身上...不過拉開窗簾無落雨...
7點幾叫醒顧生...落餐廳食早餐...唔知係咪個人休息唔夠定早餐太heavy....完全無胃口...
邊有可能一起身食煎蛋、煎火腿、煎香腸??!!可以用無食過早餐黎形容....果汁又唔敢飲太多..
驚一陣著住禮服要周圍搵洗手間...
等顧生食完早餐上返房拎行理去紅豆...點知!! 一落返酒店樓下就落雨啦!!!
呢一刻既心情...係由喜瑪拉亞山山頂直插到落谷底...落雨...好大雨..
因為落雨...因為返工返學時間...我地要行出大街先搵到的士....
係的士上面我已經預計到...到左紅豆佢地會同我地講d咩.....
原本9點要到紅豆..不過因為以上種種因素...最後9:30先去到紅豆Studio...
一個女仔出黎接呼我地....原來佢係欣怡....我既化妝師...
(早期少少既B2B一定知欣怡原本係紅豆既客服...後來做左化妝師)
佢同我地講因為出面落緊大雨係一定無可能影到外景..
佢提議我地考慮改期或者影全內景......OH no no no!!!
我同欣怡講我睇過台灣氣象局...話台中今日只係間中大雨..即係唔會落全日..
不過欣怡話台灣人都只係信五成..個天又咁黑...睇怕會有排落....
跟住佢話比時間我同顧生考慮下......然後好自覺咁行開左.....

顧生話既然黎到台灣影全內景無意思....如果真係影唔到外景不如改期....
我同顧生講..影全內景係一定無可能....改期我都唔會....我地影相既時候已經係5月中...
改6,7,8月台灣都有可能打風...9月影已經趕唔切我地11月結婚....
更何況我地要返工...假期要留返結婚用..仲要用多幾千蚊黎台灣...無可能!!
我堅持同顧生講台灣氣象局話台中今日只係間中大雨..唔會落全日...我要賭一舖！
顧生同欣怡見我咁堅決都再無阻止我....就賭一舖啦!
已經10點...欣怡啦啦聲同我化妝....其實一路化妝我都好擔心....我驚化完妝都唔停雨唔知點算...

紅豆既化妝間:

見到我既"小桃紅"嗎?? 哈哈...我地果日就係帶住佢周圍去...

我化妝化左好耐...顧生好無聊就周圍影相.....叫我整金魚咀比佢影...
(大家掛住欣怡嗎???)

小插曲:
欣怡問我前一晚洗頭係咪落左護髮素...我答佢無呀.....我好聽話無用到...
佢話我d頭髮太順滑同柔軟...佢幫我set d曲髮好快會玩完...(我應該開心嗎? T__T")
原本我想佢幫我係神社果度set曲髮襯婚紗...
佢答我: 你的頭髮太不聽話了...卷了又直回來....聽天由命吧...



整完一大輪...我差唔多ready既時候...
又見到尋日幫顧生試身果個男仔過黎幫顧生換衫..Set頭 同 化妝..
後來知道佢叫綿羊..我地既燈光師 + 助理...陽光男孩
顧生真係好姿整...話人地Set佢個頭唔夠靚...一陣又叫人地比支Color spray佢噴啡d頭髮..
又呢樣又果樣...搞完一大輪...顧生出去睇睇個天氣...返黎同我講:停左雨啦!!
開心到想大嗌!!....因為之前遲左一個鐘化妝...依家要追返d時間...啦啦聲出發....
落到樓下Rex已經係車度等緊我地...原本先開車去買氣球...點知鋪頭無開到...
跟住再發現係香港帶過黎既花球同道具都唔記得放上車...
不過Rex話唔緊要...影內景果陣補返就ok....
算啦...影到外景我都已經好開心....

我地今日既行程係: 苗栗縣飛牛牧場 --> 神社 --> 海灘 --> 紅豆內景..
Rex一邊ja車...一邊同我地傾計說笑....好似去郊遊咁...



(可能因為朝早落雨對我地打擊太大...竟然唔記得叫欣怡幫我地影花絮 ...所以我只能用文字表達)

->差唔多一個鐘既車程就去到我地第一個拍攝景點: 苗栗縣 - 飛牛牧場
係飛牛牧場影左兩套衫...亦終於解開左我一路以黎既大問號...
究竟d新人係點樣係條街度換衫?! 

->跟住落神社...企係草地影相..比蚊咬到我地癲左....

->影完神社...Rex開快車飄移地車我地去海灘影日落....
Rex話個個都知Mars手車辣...其實佢都識飄移..反正趕時間..比我地見識下

-> 終於影完我地最想影既海灘....踏上回程路...我同顧生就係車度玩自拍...
(大家有無見到我既曲髮已經變返長直髮??)



返到紅豆...欣怡又幫我卷過d頭髮...補妝...
顧生又自已 re-set下個頭...又要拎支Color spray補色...


影埋個內景...已經係夜晚10點啦...
我地成班人都成日無食過野...我更加連水都唔敢飲...
連飛牛牧場最出名既牛奶我都無飲到...ToT"
為左比佢地快快食野休息...我同顧生9秒9換衫離開紅豆...
離開之前欣怡同我地講左句: 你們賭贏了...
是的!...我們賭贏了!.....呢一日幾趕...幾辛苦都值得!....

搭的去返酒店放底"小桃紅"....再出逢甲醫肚...
我相信我地係太肚餓...所以一口氣食左好多好多野...
直至感到非常滿足(嘩哈哈) 先肯擺駕回宮...

______________________________________________________________

提提大家 影相日 要注意既地方:

- 一定一定要食早餐
- 記得帶水去飲 (最好連飲管..唔驚整甩唇膏)
- 帶乾糧
- 出門前搽防曬同蚊怕水 (特別係夏天 / 去大自然影相既新人們)
- 帶定膠布、平安藥以防萬一
- 一定要自備化妝粉撲...(如果唔係你就會好似我咁...生豆豆...)
- 如果你係平日影相...早少少出門口...因為你出門既時候..亦都係台灣人返工返學既時候...
人多車多...好易塞車遲到...跟住遲化妝...遲出發...所有野都會變到好趕...
- 除非你全部相都好靜態...如果唔係既話...就算你揀既禮服全部都係長裙..都請你著定打底褲...
(我地係飛牛牧場影相果陣要爬樹..)
- 如果你expect你地會落水影相..記得帶毛巾搽身..
- 幫你既babe帶埋卸妝物品....(你點可能叫佢自備? 哈哈....我要幫顧生落埋妝添呀)
- 記住買護髮素....(因為Set頭噴既定型水係唔可以靠洗頭水洗得走...一定要落護髮素先整得甩...
用完護髮素過水...再用洗頭水洗頭先會乾淨)
- 如果你眼睛比較敏感...記住買定眼藥水 (影Pre-wedding化既妝會好濃...由其係眼妝..
加上痴假睫毛既膠水好難落..所以在所難免你卸妝果陣係會不斷搞到隻眼...
我落妝果陣搞到隻眼好痛係咁流眼水....滴眼藥水令到隻眼舒服d)


黎緊我好快會post 台灣Pre-wedding既相...
不過...只限"關注"左既blog友先會睇到