花車 Confirmed - 保時捷

早係出發去台灣之前就意識到差唔多要訂花車...
顧生好清楚我...一開始整結婚既野我就講過我想要同其他人唔一樣既野...
自已上網睇過好多間...誠信, 鑽軒, 啟聰, 軒武, Dream Wedding, Avis.....間間都無乜特別....
唔係Benz (鳳眼,四眼仔)就係London taxi...個個結婚都用...Avis有Rolls Royce...不過現代款RR都有好多人用...比較多人用既車我都唔鐘意....(是的...份人比較麻煩!)

結果比我搵到Porsche 保時捷 同 Vintage版Rolls Royce

Porsche Panamera 4:
呢架波子係2010年既車...落地只有兩年...靚仔有型!
有次係金都閒逛 (無錯係閒逛..每次係旺角附近無野做就同顧生去果度運吉...每次去都唔會有幫襯)
發現有間鋪頭 - Sun Beauty有得租呢架波子...初初都ok..諗住連同小巴一齊租埋....
老闆話如果ok可以落住$1200訂...尾數big day當日比司機..
跟住我返到屋企又問下wedding planner意見啦...(WP比較反對幫襯金都..不過佢話租車呢d野無得講...
好唔好係要睇個司機當日識唔識路..有無禮貌..準唔準時..全部都係當日先知...去到邊都一樣..叫我地鐘意就訂)..當時距離去台灣仲有1日...
第二朝我同顧生一早去金都諗住交訂..租左無煩惱..因為好唔容易先搵到一架我同顧生都鐘意既車..但點知佢星期六係比較遲開門既...我地下午要返工..等唔切佢開門就走左..
第二日一早我同顧生就飛左去台灣啦....

返到黎香港幾日...收佢Sun Beauty電話話有人想訂呢架車...問我地仲要唔要?! 我地唔要就會即刻租比第個..突如其來一個電話搞到我唔知點算...即刻打比顧生問佢意見..顧生話要...跟住個老闆竟然叫我地比全數落訂.... 
WHAT?! 比全數???我乜都無用到就比幾千蚊你? 我同老闆講: 上次你話落住$1200訂...尾數big day當日比司機既? 佢即時話: 如果你唔想比全數都ok既....

其實..係我返左黎香港之後我已經唔想租Sun Beauty...所以一直無再contact佢...
第一...我搵到第二間租車公司有波子租...不過價錢貴少少...但so far 上網comment ok..
第二...上網search過Sun Beauty 口碑一般...想知多d可以睇睇呢個post..
http://blog.yahoo.com/benmandy/articles/22348
第三...WP話我知好多人做生意..見你想租又唔租就會打電話拋你...話你知你想要果樣野..另外有人都想要...迫你做決定..
再加上老闆收訂金方面前後矛盾...我既信心已經跌到落谷底......bye bye...

 

放棄左Sun Beauty..打算租第二間既時候...比我發現左呢架Vintage Rolls Royce...
我睇相既時候..呢架車仲係英國準備緊運黎香港..即係之前無係香港出現過..i like it!
跟住我問租車公司呢架RR要租幾多錢...對方話價錢未定到...要等架RR到左香港驗左車先有價錢..
呢邊一直等呀等...果邊又驚架波子比人租左...所以我keep住隔日打去問下架波子有無比人租到...
好痴線.....

Vintage Rolls Royce:


直到6月1號...我收到Vintage Rolls Royce公司既msg...對方話架車到左香港..
不過比車房睇過左部份零件需要維修同係外國訂購...擔心唔知要整幾耐...
為左唔想擔誤我地租其他花車..所以佢地暫時唔接受order住....

睇到個msg..唔開心左短短幾分鐘...我就滿心歡喜打比顧生: 寶貝..我地訂波子啦

生記
Address: 九龍美孚新村第一期百老匯街5B九字樓
Tel: 2741-6868 / 2742 9559 / 2743 2277

唔知係咪同架波子有緣份...原來架波子就泊左係美孚...顧生落樓行幾步就睇左車..落埋訂...
令立立既外表...全真皮內籠..連顧生呢個185cm高既小朋友坐入去都唔會覺得窄..正!
當日租車公司果位人兄話如無意外..當日既司機都會係佢...(太好..見埋個司機..)
佢當日講左句: 到時接新娘..架車一開engine..唔洗睇到架車...把聲都贏晒....
...型呀!!