席間遊戲1

直至結婚前4日我都唔打算要席間遊戲...
然後...婚前第3日..我既MC - Tony打電話比我...問我係咪唔記得update佢...
我同佢講我..Game list上面無一個game我想玩...參考過其他人既games...
唔係太嘈就係同wedding一d關系都無...
我係個好怕嘈既人...甚麼用分貝機鬥大聲我真係接受唔到...
甚麼印銀紙,大抽獎同個wedding一d關系都無...都唔係我想要既...
總之就唔係我杯茶...我情願CXL呢個環節....

好彩....我既MC係Tony (有一個專業既MC真係好重要)
佢聽完我既意見跟住同我慢慢分析...我地既賓客都係同事、朋友為主....
呢班人好玩得...會nature high...唔應該放過呢個咁好既機會...

Tony最後幫我安排左3個唔on list既遊戲...
係我上網 & 過住參加婚禮都未玩過既...全部好玩得黎又sweet...
就係因為Tony....我地既婚禮先有返席間遊戲...先有當晚咁好既氣氛

Game 1 - 最多小朋友
敬完酒之後我直衝入新娘房換送客晚裝(時間勁趕)...而顧生就不斷比人拉住影相...
成個場交晒比Tony...我唔知係Tony抄興左個場...定我地班朋友本身就癲癲地....
因為就咁睇返d相已經見到佢地玩得好開心....睇video更加令我"傻眼"...

呢一個game...就係Tony問:邊一檯有最多少朋友?!...
有好多人都如實報數...不過以下呢班人話自已果檯有12個!!!


12個!!! 12個!!! 12個!!! 12個!!!

佢地不斷叫囂...不停揮動佢地既手...

終於成功引到Tony注意!!

最爆既係...Tony話:你唱首校歌黎聽聽我就信啦..
呢位小姐就唱左: 我們是快樂的好兒童，我們天天一起歌唱(全首唱晒)

Nature high既好例子...全世界一齊望過黎

然後呢一班傻人得到既係.....一份今佢地哭笑不得既禮物 - 美國冒險樂園金幣一袋
(不過小朋友係玩呢d架啦..好合情理!!)


呢個笑話...到我結完婚仲講緊...